راولپنڈی(این این آئی)طالبعلم کو اغوا کے بعد زیادتی کا نشانہ بنانے والے دو ملزم مقابلے میں ہلاک ہوگئے،

ملزمان پر پہلے سے ہی گاڑیوں کی چوری اور بچوں کے ساتھ زیادتی کے متعدد مقدمات درج تھے۔تفصیلات کے مطابق وفاقی دارالحکومت کے جڑواں شہر راولپنڈی میں سنگین جرائم میں ملوث دو ملزمان پولیس کے ساتھ مبینہ مقابلے میں مارے گئے۔سی سی ڈی حکام نے بتایا کہ یہ ملزمان ایک 12سالہ طالبعلم کے اغوا اور اسے زیادتی کا نشانہ بنانے کے گھنانے واقعے میں ملوث تھے۔پولیس حکام نے بتایا کہ ملزمان نے چند روز قبل ایک 12سالہ بچے کو اغوا کیا تھا، ملزمان نے مغوی بچے کو اپنی ہوس کا نشانہ بنایا اور بعد ازاں اس کی بازیابی کے بدلے اہل خانہ سے بھاری تاوان بھی وصول کیا تھا۔واقعے کے بعد متاثرہ طالبعلم نے کارروائی کے دوران ہلاک ہونے والے دونوں ملزمان کی باقاعدہ شناخت کر لی ہے۔ہلاک ہونے والے ملزمان پر پہلے سے ہی گاڑیوں کی چوری اور بچوں کے ساتھ زیادتی کے متعدد مقدمات درج تھے۔

سی سی ڈی حکام کے مطابق ملزمان کو جب گرفتاری کے لیے لے جایا جا رہا تھا یا چھاپہ مارا گیا تو انہوں نے مزاحمت کی، جس کے نتیجے میں ہونے والے مقابلے میں وہ ہلاک ہو گئے۔پولیس نے کہا کہ ایسے درندہ صفت عناصر کا خاتمہ معاشرے کے لیے ناگزیر تھا اور واقعے کی مزید قانونی تحقیقات جاری ہیں۔