اسلام آباد (نیوز ڈٰیسک) حکومت نے عالمی مالیاتی ادارے International Monetary Fund
کی تجاویز کے پیش نظر یکم جولائی سے گاڑیوں کی درآمد کے قواعد مزید سخت کرنے کا فیصلہ کر لیا ہے۔ذرائع کے مطابق وزارتِ صنعت و پیداوار نے ایک نیا فریم ورک تیار کیا ہے، جس کے تحت اب عام افراد یا غیر رجسٹرڈ ادارے بیرونِ ملک سے گاڑیاں نہیں منگوا سکیں گے۔ یہ سہولت صرف اُن کمپنیوں کو حاصل ہوگی جو کمپنیز ایکٹ 2017 کے تحت رجسٹرڈ ہوں اور فعال این ٹی این رکھتی ہوں۔نئی پالیسی کے مطابق ایسی گاڑیوں کی درآمد کی اجازت نہیں ہوگی جن کے لیے پاکستان میں بعد از فروخت سروس کا باقاعدہ نظام موجود نہ ہو۔ درآمد کنندگان کو یہ بھی ثابت کرنا ہوگا کہ ان کے پاس اصل اسپیئر پارٹس، تربیت یافتہ عملہ اور جدید تشخیصی (ڈائیگناسٹک) سہولیات دستیاب ہیں تاکہ گاڑیوں کی مرمت اور دیکھ بھال ممکن ہو سکے۔مزید یہ کہ صرف وہی گاڑیاں درآمد کی جا سکیں گی جو عالمی حفاظتی اور ماحولیاتی معیارات پر پورا اترتی ہوں۔
اس مقصد کے لیے پہلے سے کوالٹی اور ماحولیاتی سرٹیفکیٹ جمع کرانا لازمی ہوگا، جبکہ پاکستان پہنچنے کے بعد فٹنس ٹیسٹ بھی ضروری قرار دیا گیا ہے۔استعمال شدہ (پرانی) گاڑیوں کے معاملے میں امپورٹرز کو انجن، چیسز اور دیگر شناختی تفصیلات کا مکمل ڈیجیٹل ریکارڈ فراہم کرنا ہوگا۔ ساتھ ہی ایسے درآمد کنندگان کے لیے انجینئرنگ ڈویلپمنٹ بورڈ میں رجسٹریشن بھی لازم ہوگی۔حکام کا کہنا ہے کہ ان اقدامات کا مقصد غیر معیاری گاڑیوں کی درآمد روکنا، صارفین کو بہتر سہولیات فراہم کرنا اور ٹیکس نظام کو مضبوط بنانا ہے۔ ماہرین کے مطابق اس پالیسی سے مقامی آٹو انڈسٹری کو فائدہ پہنچ سکتا ہے، تاہم درآمدی گاڑیوں کی قیمتوں میں اضافے کا امکان بھی موجود ہے۔
