دادو(این این آئی)رشتہ نہ ملنے پر ملزم کی فائرنگ سے لڑکی جاں بحق ہوگئی جبکہ ملزم نے خود کو بھی گولی مار لی۔
تفصیلات کے مطابق دادو کے تھانہ فرید آباد کی حدود میں رشتہ نہ ملنے کے تنازع پر ملزم کی فائرنگ سے لڑکی جاں بحق ہو گئی جبکہ اس کی ماں زخمی ہوگئی۔ واقعے کے بعد ملزم نے خود کو بھی گولی مار کر خودکشی کر لی۔پولیس کے مطابق ملزم شہمیر نے لڑکی کے گھر میں داخل ہو کر فائرنگ کی جس کے نتیجے میں لڑکی موقع پر ہی دم توڑ گئی، جبکہ مقتولہ کی ماں شدید زخمی ہو گئی۔ واردات کے فورا بعد ملزم نے اسی پستول سے اپنی زندگی کا بھی خاتمہ کر لیا۔مقتولہ کے والد نے پولیس کو بتایا کہ ان کی بیٹی کا رشتہ پہلے ہی اپنے بھتیجے سے طے تھا اور شادی کی تاریخ بھی مقرر ہو چکی تھی۔ ملزم رشتہ نہ ملنے پر رنجیدہ تھا جس کی وجہ سے اس نے یہ ہولناک قدم اٹھایا۔ پولیس نے واقعے کی تحقیقات کا آغاز کر دیا ہے۔
