نیشنل ڈیزاسٹر مینجمنٹ اتھارٹی (این ڈی ایم اے) نے 5 مئی تک ملک بھر میں متوقع موسمی صورتحال کے حوالے سے الرٹ جاری کر دیا ہے،

جس میں شدید گرمی کے ساتھ بعض علاقوں میں بارش اور آندھی کی پیشگوئی کی گئی ہے۔
ادارے کے مطابق آنے والے دنوں میں ملک کے بیشتر حصے گرمی کی شدید لہر کے زیرِ اثر رہیں گے، تاہم چند علاقوں میں گرج چمک کے ساتھ بارش بھی متوقع ہے۔
رپورٹ کے مطابق سندھ، جنوبی پنجاب اور بلوچستان کے مختلف علاقوں میں درجہ حرارت خطرناک حد تک بڑھ سکتا ہے۔ کراچی، حیدرآباد، سکھر، لاڑکانہ، ملتان، بہاولپور اور تربت جیسے شہر شدید گرمی سے زیادہ متاثر ہونے کا امکان ہے۔
اسی طرح خیبرپختونخوا اور وسطی پنجاب میں بھی گرمی کی شدت میں اضافہ متوقع ہے، جس کے باعث ہیٹ اسٹروک اور پانی کی کمی جیسے مسائل پیدا ہو سکتے ہیں۔
دوسری جانب 24، 25 اور 29 اپریل کو پنجاب کے بالائی اور وسطی علاقوں، جن میں لاہور، اسلام آباد، راولپنڈی، فیصل آباد اور سرگودھا شامل ہیں، میں تیز ہواؤں اور گرج چمک کے ساتھ بارش ہونے کی توقع ہے۔
بلوچستان کے شمالی اضلاع جیسے کوئٹہ، زیارت اور قلات جبکہ خیبرپختونخوا کے مختلف علاقوں میں بھی 24 سے 29 اپریل کے دوران وقفے وقفے سے بارش کا امکان ظاہر کیا گیا ہے۔ اس کے علاوہ گلگت بلتستان اور آزاد کشمیر میں بھی بارش متوقع ہے۔
این ڈی ایم اے نے متعلقہ اداروں کو ہدایت دی ہے کہ ہیٹ ویو سے نمٹنے کے لیے پیشگی اقدامات کیے جائیں، کولنگ سینٹرز قائم کیے جائیں اور اسپتالوں کو کسی بھی ہنگامی صورتحال کے لیے تیار رکھا جائے۔
عوام کو تاکید کی گئی ہے کہ شدید گرمی کے دوران غیر ضروری طور پر باہر نکلنے سے پرہیز کریں، پانی کا زیادہ استعمال کریں اور تازہ معلومات کے لیے ‘پاک این ڈی ایم اے ڈیزاسٹر الرٹ’ ایپ سے رہنمائی حاصل کریں۔