اسلام آباد(نیوز ڈ یسک) آذربائیجان نے عندیہ دیا ہے کہ وہ پاکستان کی توانائی ضروریات پوری کرنے میں مدد کے لیے مائع قدرتی گیس (ایل این جی) فراہم کرنے کے لیے تیار ہے۔

اس حوالے سے SOCAR نے کہا ہے کہ جیسے ہی اسلام آباد کی جانب سے باضابطہ درخواست موصول ہوگی، فوری طور پر گیس کی فراہمی ممکن بنائی جا سکتی ہے۔غیر ملکی میڈیا کو دیے گئے بیان میں کمپنی کا کہنا تھا کہ پاکستان اس وقت توانائی کے بڑھتے ہوئے دباؤ کو کم کرنے کے لیے اسپاٹ مارکیٹ سے ایل این جی کارگو حاصل کرنے کی کوشش کر رہا ہے۔ مزید بتایا گیا کہ 2025 میں SOCAR Trading اور Pakistan LNG Limited کے درمیان ہونے والے فریم ورک معاہدے کے تحت پاکستانی خریدار کو تیز اور براہِ راست طریقہ کار کے ذریعے ایل این جی خریدنے کی سہولت حاصل ہے۔کمپنی کے مطابق جیسے ہی پاکستان ایل این جی لمیٹڈ کی جانب سے درخواست دی جائے گی، سپلائی کا عمل شروع کیا جا سکتا ہے،

تاہم اس بارے میں کوئی تفصیل فراہم نہیں کی گئی کہ آیا اب تک کوئی درخواست دی جا چکی ہے یا پہلی کھیپ کب روانہ ہو سکتی ہے۔واضح رہے کہ پاکستان اپنی توانائی ضروریات کے لیے بڑی حد تک گیس پر انحصار کرتا ہے، جبکہ مقامی پیداوار میں کمی اور عالمی منڈی میں قیمتوں کے اتار چڑھاؤ نے صورتحال کو مزید پیچیدہ بنا دیا ہے۔ خاص طور پر حالیہ علاقائی کشیدگی کے باعث گیس کی سپلائی میں رکاوٹوں نے توانائی بحران کے خدشات کو بڑھا دیا ہے۔