اسلام آباد (نیوز ڈیسک)پاکستانی روپے کے مقابلے میں ایرانی ریال کی قدر میں حالیہ دنوں میں واضح بہتری دیکھنے میں آئی ہے،

جس نے اوپن کرنسی مارکیٹ میں توجہ حاصل کر لی ہے۔مارکیٹ رپورٹس کے مطابق گزشتہ چند ہفتوں کے دوران ایرانی ریال کی قدر میں نمایاں اضافہ ہوا ہے اور یہ پاکستانی روپے کے مقابلے میں تقریباً چار گنا مضبوط ہوا ہے۔ اس وقت ایک پاکستانی روپیہ تقریباً 4717 ایرانی ریال جبکہ 10 روپے لگ بھگ 47170 ریال کے برابر ہیں۔اگرچہ ایران کو عالمی پابندیوں اور مہنگائی جیسے مسائل کا سامنا ہے، اس کے باوجود پاکستان کی کرنسی مارکیٹ میں ایرانی ریال کی طلب میں اضافہ دیکھا جا رہا ہے۔ذرائع کے مطابق جہاں پہلے ایک کروڑ ایرانی ریال تقریباً 2500 روپے میں دستیاب تھے، وہیں اب اس کی قیمت بڑھ کر تقریباً 10 ہزار روپے تک پہنچ گئی ہے۔ماہرین کا کہنا ہے کہ پاکستان میں بعض تاجر امریکا اور ایران کے درمیان ممکنہ مذاکرات یا پابندیوں میں نرمی کی توقع پر ریال خرید رہے ہیں، جسے وہ ایک فائدہ مند سرمایہ کاری سمجھ رہے ہیں۔

مزید یہ کہ پاکستان اور ایران کی سرحدی علاقوں، خصوصاً بلوچستان کے راستوں سے ہونے والی غیر رسمی تجارت میں اضافے نے بھی ایرانی ریال کی مانگ کو بڑھا دیا ہے۔ایکسچینج مارکیٹ کے ذرائع کے مطابق فوری منافع کی امید میں خریداروں کی دلچسپی میں اضافہ ہوا ہے، جبکہ خطے میں غیر یقینی صورتحال اور بدلتے تجارتی رجحانات بھی اس رجحان کو تقویت دے رہے ہیں۔