لاہور (این این آئی)پاکستان اور سعودی عرب کے باہمی تعاون سے حج انتظامات میں ایک اہم پیش رفت سامنے آئی ہے،
جس کے تحت علامہ اقبال انٹرنیشنل ایئرپورٹ کو باضابطہ طور پر ”روڈ ٹو مکہ” منصوبے کا حصہ بنا دیا گیا ہے۔ اس اقدام سے خصوصا پنجاب سے تعلق رکھنے والے ہزاروں عازمینِ حج کو بڑی سہولت میسر آئے گی۔تفصیلات کے مطابق سعودی حکام نے لاہور ایئرپورٹ انتظامیہ کو آگاہ کیا ہے کہ رواں سال یہاں سے روانہ ہونے والے تمام حجاج کی امیگریشن اور کسٹمز کلیئرنس کا عمل پاکستان میں ہی مکمل کیا جائے گا۔ اس سلسلے میں سعودی ڈائریکٹر آپریشن حج فواذ سعود الشریفی نے ایئرپورٹ حکام کے ساتھ اجلاس کیا، جس میں منصوبے کے عملی پہلوں پر تفصیلی بریفنگ دی گئی۔”روڈ ٹو مکہ”منصوبے کے تحت سعودی امیگریشن کے مراحل پاکستانی ایئرپورٹس پر ہی مکمل کیے جاتے ہیں، جس کے باعث عازمین کو سعودی عرب پہنچنے کے بعد طویل قطاروں اور پیچیدہ مراحل سے گزرنا نہیں پڑتا بلکہ وہ براہِ راست اپنی رہائش گاہوں کی جانب روانہ ہو سکتے ہیں۔
اس سے قبل یہ سہولت صرف جناح انٹرنیشنل ایئرپورٹ اور اسلام آباد انٹرنیشنل ایئرپورٹ تک محدود تھی، تاہم اب لاہور کی شمولیت سے اس منصوبے کا دائرہ مزید وسیع ہو گیا ہے۔حکام کے مطابق اس پیش رفت سے حج فلائٹ آپریشن کو زیادہ موثر اور منظم بنایا جا سکے گا جبکہ بزرگ اور بیمار عازمین کو خصوصی طور پر آسانی فراہم ہوگی۔یہ اقدام نہ صرف سہولت میں اضافہ کرے گا بلکہ پاکستان اور سعودی عرب کے درمیان تعاون کو بھی مزید مضبوط بنائے گا۔
