پشاور(این این آئی) پختونخوا میں ڈاکٹروں کی بھرتی کیلئے نیا میرٹ معیار جاری کردیا گیا۔

محکمہ صحت خیبر پختونخوا کی جانب سے ڈاکٹروں کی بھرتی سے متعلق جاری نئے نوٹیفکیشن میں کہا گیا ہے کہ ڈاکٹروں کی بھرتی میں تعلیمی نمبرز کو 60فیصد وزن دیا جائے گا۔نوٹیفکیشن کے مطابق اعلیٰ تعلیم کیلئے امیدواروں کو 20فیصد اضافی نمبرز ملیں گے اور انٹرویو کیلئے بھی 20فیصد نمبرز مختص کیے گئے ہیں جبکہ مجموعی سکور 100رکھا گیا۔اس کے علاوہ میرٹ کو مزید شفاف بنانے کیلئے نئی درجہ بندی متعارف کرائی گئی ہے جس کے تحت فرسٹ، سیکنڈ اورتھرڈ ڈویژن ڈگریوں کے مطابق نمبرزکی مزید تقسیم کی جائے گی۔نوٹیفکیشن کے مطابق ایک، دو اور تین اضافی ڈگریوں پربالترتیب 10، 15اور 20نمبر دئیے جائیں گے۔ڈاکٹروں کی بھرتی کے لیے جاری نئے میرٹ معیارکا اطلاق فوری طور پر ہوگا۔