اسلام آباد (نیوز ڈیسک) ڈسٹرکٹ کورٹ نے بیوی پر بدکاری کا جھوٹا الزام لگانے والے شوہر کو سخت سزا سناتے ہوئے کوڑوں کی سزا کا حکم دے دیا۔

نجی ٹی وی کی رپورٹ کے مطابق ایڈیشنل سیشن جج رانا خلیل احمد خان نے کیس کا فیصلہ سناتے ہوئے ملزم محمد بوٹا کو 80 کوڑے مارنے کی شرعی سزا دی۔ تاہم عدالتی فیصلہ سننے کے فوراً بعد ملزم موقع سے فرار ہو گیا۔مقدمے کی پیروی سینیئر وکیل نیر اقبال لکھوی نے کی۔ کیس کی تفصیلات کے مطابق ملزم نے اپنی اہلیہ پر بدکرداری کا الزام عائد کیا تھا اور اپنی نومولود بیٹی کو بھی ناجائز قرار دیا تھا۔

متاثرہ خاتون نے شوہر کے خلاف حدود آرڈیننس کے تحت قذف کا مقدمہ دائر کیا تھا۔ سماعت کے دوران ملزم اپنے الزامات ثابت کرنے میں ناکام رہا اور بعد ازاں اپنے ہی دعوؤں سے پیچھے ہٹ گیا، یہاں تک کہ اس نے بچی کو جائز تسلیم کر لیا۔

عدالت کے اس فیصلے کو ایک اہم اور غیر معمولی عدالتی اقدام قرار دیا جا رہا ہے، جو ایسے مقدمات میں ایک مثال کے طور پر دیکھا جا رہا ہے۔