اسلام آباد (نیوز ڈ یسک)میرپورخاص میں ایک میڈیکل طالبہ کی مشتبہ خودکشی کے کیس میں نئی پیش رفت ہوئی ہے،
جہاں پولیس نے کالج کے پرنسپل اور ان کی اہلیہ سمیت پانچ افراد کے خلاف مقدمہ درج کر لیا ہے۔پولیس کے مطابق ایف آئی آر میں پرنسپل تنویر عالم، ان کی اہلیہ پروفیسر فرزانہ، فارمیسی کے لیکچرر عابد لغاری اور دو طلبہ کو نامزد کیا گیا ہے۔ یہ مقدمہ طالبہ کے ماموں کی مدعیت میں درج کیا گیا ہے، جس میں ہراسانی اور خودکشی پر مجبور کرنے کی دفعات شامل کی گئی ہیں۔مقدمے کے متن میں الزام لگایا گیا ہے کہ مذکورہ لیکچرر اور دو طلبہ طالبہ کو بلیک میل کر رہے تھے۔ اس حوالے سے کالج انتظامیہ کو کئی بار آگاہ کیا گیا، لیکن کارروائی کرنے کے بجائے طالبہ پر شکایت واپس لینے کے لیے دباؤ ڈالا جاتا رہا۔
مزید الزامات کے مطابق اگر طالبہ شکایت واپس نہ لیتی تو پرنسپل اور ان کی اہلیہ کی جانب سے اس کا داخلہ ختم کرنے کی دھمکیاں دی گئیں اور اسے مسلسل ذہنی دباؤ کا سامنا کرنا پڑا۔پولیس حکام کا کہنا ہے کہ کیس کی تحقیقات جاری ہیں اور جلد مزید حقائق سامنے آنے کی امید ہے۔
