مری/راولپنڈی(این این آئی) مری اور گردونواح میں گزشتہ آٹھ روز سے جاری طوفانی بارشوں کے باعث مختلف مقامات پر لینڈ سلائیڈنگ کے واقعات پیش آئے ہیں۔

محکمہ موسمیات کے مطابق اب تک مجموعی طور پر 100 ملی میٹر سے زائد بارش ریکارڈ کی جا چکی ہے۔ڈی پی او مری ڈاکٹر محمد رضا تنویر کے مطابق مسلسل بارش اور زمین میں نمی کی زیادتی کی وجہ سے پہاڑی تودے گرنے کا سلسلہ جاری ہے، جس کے پیشِ نظر جھیکا گلی، لارنس کالج روڈ، لوئر ٹوپہ اور دھیر کوٹ ستیاں کو ‘ہائی رسک’ قرار دے دیا گیا ہے۔ ان اہم شاہراہوں کے علاوہ متعدد مقامات پر چھوٹی لینڈ سلائیڈنگ اور پہاڑوں سے پتھر گرنے کے واقعات بھی رپورٹ ہوئے ہیں۔انہوں نے بتایا کہ شدید دھند کے باعث کئی مقامات پر حدِ نگاہ انتہائی کم ہے، جبکہ سڑکیں شدید پھسلن کا شکار ہیں، جس سے ٹریفک حادثات کا خطرہ بڑھ گیا ہے۔ صورتحال کی سنگینی کو دیکھتے ہوئے ڈی پی او مری خود فیلڈ میں موجود ہیں اور حساس مقامات کی مانیٹرنگ کر رہے ہیں۔ مری پولیس اور ٹریفک پولیس کی مکمل نفری تمام اہم پوائنٹس پر ہائی الرٹ اور تعینات ہے، جبکہ ضلعی انتظامیہ کے ساتھ مل کر سڑکوں کی صفائی کا کام بھی جاری ہے۔ڈی پی او مری نے سیاحوں اور مقامی آبادی کے لیے ہنگامی ٹریول ایڈوائزری جاری کرتے ہوئے غیر ضروری سفر سے گریز کی ہدایت کی ہے۔

انہوں نے عوام پر زور دیا ہے کہ سفر کے دوران فوگ لائٹس کا استعمال یقینی بنائیں اور گاڑی کی رفتار انتہائی کم رکھیں۔ ڈاکٹر محمد رضا تنویر نے کہا کہ حساس مقامات پر ٹریفک کو ریگولیٹ کیا جا رہا ہے تاکہ کسی بھی جانی نقصان سے بچا جا سکے۔ انہوں نے واضح کیا کہ کسی بھی ہنگامی صورتحال سے نمٹنے کے لیے ایمرجنسی رسپانس میکانزم’ پوری طرح فعال ہے اور عوام کی جان و مال کا تحفظ ہماری اولین ترجیح ہے۔ کسی بھی مشکل کی صورت میں شہری فوری طور پر پولیس ہیلپ لائن 15 پر رابطہ کریں۔