اسلام آباد (این این آئی)نیشنل ڈیزاسٹرمینجمنٹ اتھارٹی (این ڈی ایم اے) کے نیشنل ایمرجنسیز آپریشن سینٹر نے 11 اپریل سے سندھ کے مختلف علاقوں میں ممکنہ شدید گرمی کے پیش نظر الرٹ جاری کر دیا۔

منگل کو این ڈی ایم اے سے جاری بیان کے مطابق 11 اپریل کے بعد سندھ میں درجہ حرارت میں بتدریج اضافہ متوقع، شدید گرمی کی لہر کا خدشہ ہے،رات کا درجہ حرارت معمول سے 3 سے 5 ڈگری زیادہ جبکہ دن کا 5 سے 7 ڈگری زیادہ ہونے کا امکان ہے۔سندھ کے متعدد اضلاع بشمول دادو، جیکب آباد، لاڑکانہ اور گردونواح کے علاقے شدید گرمی کی لپیٹ میں رہیں گے۔جامشورو، قمبر شہدادکوٹ، گھوٹکی، خیرپور، سانگھڑ، عمرکوٹ اور کشمور میں بھی ہیٹ ویو کا خدشہ ہے۔جھل مگسی، اوستہ محمد اور ڈیرہ مراد جمالی میں بھی گرمی کی شدت میں اضافہ متوقع ہے۔بہاولنگر، بہاولپور اور رحیم یار خان میں ہیٹ ویو الرٹ میں شہریوں کو محتاط رہنے کی ہدایت کی گئی ہے۔دن کے اوقات میں غیر ضروری باہر نکلنے سے گریز کریں، پانی کا زیادہ استعمال یقینی بنائیں،بزرگوں، بچوں اور محنت کش طبقے کا خاص خیال رکھیے۔

این ڈی ایم اے تمام موسمی صورتحال اور ممکنہ خطرات کے حوالے سے پیشگی آگاہی یقینی بنانے کے لئے کوشاں ہے اورتمام ممکنہ صورتحال اور متوقع خطرات کے حوالے سے ضروری معلومات متعلقہ اداروں اور عوام تک باہم پہنچا رہا ہے،موسمی صورتحال ممکنہ خطرات اور حفاظتی تدابیر کے بارے میں آگاہی کے لیے پاک این ڈی ایم اے ڈیزاسٹر الرٹ ایپ سے رہنمائی لیں۔