اسلام آباد(نیوز ڈ یسک)ہائر ایجوکیشن کمیشن (ایچ ای سی) نے ملک بھر میں غیر تسلیم شدہ جامعات اور غیر رجسٹرڈ کیمپسز کی تازہ فہرست جاری کر دی ہے،
جس میں بڑی تعداد صوبہ پنجاب کی سامنے آئی ہے۔کمیشن کے مطابق پنجاب میں 94 ایسے ادارے موجود ہیں جو یا تو جعلی ہیں یا قانونی طور پر رجسٹرڈ نہیں۔ اسی طرح سندھ میں 35، خیبر پختونخوا میں 12، آزاد کشمیر میں 4 جبکہ وفاقی چارٹر کے تحت 2 اداروں کو بھی غیر قانونی قرار دیا گیا ہے۔ایچ ای سی نے طلبہ اور ان کے والدین کو خبردار کیا ہے کہ کسی بھی تعلیمی ادارے میں داخلہ لینے سے پہلے اس کی حیثیت ضرور چیک کریں۔ اس مقصد کے لیے سرکاری فہرست سے تصدیق کرنا انتہائی ضروری ہے تاکہ دھوکہ دہی سے بچا جا سکے۔کمیشن کا کہنا ہے کہ صرف منظور شدہ اور رجسٹرڈ جامعات میں حاصل کی گئی ڈگریاں ہی قابلِ قبول ہوتی ہیں، جبکہ غیر قانونی اداروں کی اسناد نہ تو سرکاری ملازمت کے لیے معتبر ہوں گی اور نہ ہی اعلیٰ تعلیم کے لیے تسلیم کی جائیں گی۔
