اسلام آباد(نیوز ڈ یسک) مری اور گلیات میں متوقع شدید بارشوں کے باعث سیاحوں کے لیے سفری ہدایات جاری کر دی گئی ہیں۔

ڈی پی او مری ڈاکٹر محمد رضا تنویر نے جاری کردہ ایڈوائزری میں خبردار کیا ہے کہ آئندہ دس دنوں کے دوران علاقے میں تیز بارشوں اور لینڈ سلائیڈنگ کا خطرہ موجود ہے۔ایڈوائزری کے مطابق یکم سے 10 اپریل تک مری اور اس کے نواحی علاقوں میں موسمی حالات غیر مستحکم رہیں گے، جبکہ موسلا دھار بارش اور ژالہ باری کے باعث پہاڑی راستوں پر مشکلات پیدا ہو سکتی ہیں۔سیاحوں کو ہدایت کی گئی ہے کہ سفر سے قبل موسم کی تازہ صورتحال ضرور معلوم کریں اور غیر ضروری سفر سے گریز کریں۔مزید یہ کہ شدید دھند کے باعث بعض مقامات پر حدِ نگاہ انتہائی کم ہونے کا خدشہ ہے، خاص طور پر 3 اور 4 اپریل کو صورتحال زیادہ خراب ہو سکتی ہے۔

محکمہ موسمیات پاکستان کے مطابق مری میں بارش کا امکان 80 فیصد تک ہے جبکہ درجہ حرارت کم ہو کر 4 ڈگری سینٹی گریڈ تک جا سکتا ہے۔ آئندہ دنوں میں مطلع زیادہ تر ابر آلود رہے گا اور وقفے وقفے سے بارش کا سلسلہ جاری رہنے کی پیشگوئی کی گئی ہے۔