اسلام آباد(نیوز ڈ یسک) سندھ حکومت نے خواتین کے لیے ایک اور اہم سہولت متعارف کرانے کا اعلان کر دیا ہے۔

اس حوالے سے سینئر وزیر اطلاعات شرجیل انعام میمن نے تقریب سے خطاب کرتے ہوئے نئی ٹرانسپورٹ سروس شروع کرنے کی خوشخبری سنائی۔انہوں نے بتایا کہ پنک بس اور اسکوٹی اسکیم کے بعد اب خواتین کے لیے ای وی پنک ٹیکسی سروس شروع کی جا رہی ہے۔ اس سروس کی خاص بات یہ ہوگی کہ اس میں صرف خواتین مسافر سفر کریں گی اور گاڑیاں بھی خواتین ہی چلائیں گی۔صوبائی وزیر کے مطابق سندھ حکومت خواتین کو مفت ڈرائیونگ ٹریننگ اور لائسنس فراہم کر رہی ہے، جبکہ اس منصوبے کے ذریعے ہزاروں خواتین کو روزگار کے مواقع بھی ملیں گے۔انہوں نے مزید کہا کہ خواتین معاشرے میں ہر شعبے میں برابر کی شریک ہیں اور حکومت انہیں خودمختار بنانے کے لیے مختلف اقدامات کر رہی ہے۔ ان کا کہنا تھا کہ جب پنک اسکوٹر پروگرام کا آغاز کیا گیا تو صرف 150 خواتین کے پاس لائسنس تھا، تاہم اب 20 ہزار خواتین نے ڈرائیونگ لائسنس کے لیے درخواست دے رکھی ہے۔

شرجیل میمن نے یہ بھی بتایا کہ محکمہ ٹرانسپورٹ سندھ نے کئی منفرد منصوبے متعارف کرائے ہیں، جنہیں عالمی سطح پر بھی سراہا گیا۔ ان میں پاکستان کی پہلی الیکٹرک بس سروس اور خواتین کے لیے مخصوص پنک بس سروس شامل ہیں، جہاں عملہ بھی خواتین پر مشتمل ہے۔انہوں نے کہا کہ صوبائی حکومت مراد علی شاہ کی قیادت میں مختلف ترقیاتی منصوبوں پر کام جاری رکھے ہوئے ہے اور نوجوانوں کو روزگار کے مزید مواقع فراہم کرنے کے لیے اقدامات کیے جا رہے ہیں۔