اسلام آباد(نیوز ڈیسک) وفاقی حکومت نے ملک بھر میں اسمارٹ لاک ڈاؤن نافذ نہ کرنے کا فیصلہ کر لیا ہے، جس پر اعلیٰ سطح کے اجلاس میں اتفاق رائے پایا گیا۔
میڈیا رپورٹس کے مطابق یہ فیصلہ آصف علی زرداری کی زیر صدارت ہونے والے اجلاس میں کیا گیا، جہاں مختلف تجاویز پر غور کیا گیا۔ ذرائع کا کہنا ہے کہ صوبوں کی مخالفت کے باعث اسمارٹ لاک ڈاؤن کی تجویز کو مسترد کر دیا گیا۔اطلاعات کے مطابق توانائی کی بچت کے لیے اس آپشن پر غور کیا جا رہا تھا، تاہم چاروں صوبوں کے وزرائے اعلیٰ نے اس اقدام کی مخالفت کی اور اسے ناقابلِ عمل قرار دیا۔اجلاس میں اس بات پر اتفاق کیا گیا کہ معیشت پر منفی اثر ڈالنے والے فیصلوں سے گریز کیا جائے اور اس کے بجائے متبادل اقدامات اختیار کیے جائیں۔
اس سے قبل سہیل آفریدی نے بھی واضح کیا تھا کہ اسمارٹ لاک ڈاؤن کے حوالے سے کوئی حتمی فیصلہ نہیں ہوا۔ ان کا کہنا تھا کہ صوبوں میں اس معاملے پر مختلف آراء پائی جاتی ہیں، تاہم ایسی کوئی پالیسی اختیار نہیں کی جائے گی جو معاشی سرگرمیوں کو متاثر کرے۔انہوں نے مزید کہا کہ عوام پر بوجھ ڈالنے والے اقدامات کی حمایت نہیں کی جائے گی۔
