لاہور( این این آئی)پنجاب حکومت نے سکولز میں طالب علموں کے تحفظ کیلئے نئی ہدایات جاری کردی ہیں اور اس حوالے سے مراسلہ بھی جاری کردیا گیا۔

ڈی پی آئی سیکنڈری ایجوکیشن سکولز پنجاب قیصر رشید کی جانب سے جاری مراسلہ کے مطابق پنجاب حکومت اپنے شہریوں کے تحفظ کی مکمل ذمہ دار ہے اس سلسلے میں 20 اور 21 فروری کو سکولز ایجوکیشن ڈیپارٹمنٹ نے تفصیلی ہدایات جاری کی تھیں، یاد دہانی کے طو رپر دوبارہ توجہ دلائی جا رہی ہے، ان ہدایات کے تحت سکولز کے اوقات کار میں طالب علموں اور اساتذہ کرام کا تحفظ انتہائی اہم اور ضروری ہے۔ مراسلے میں کہا گیا ہے کہ سکولز میں موجود مکمل خطرناک اور جزوی خطر ناک بلڈنگز کے اطراف حفاظتی باڑ اور تار وغیرہ ضرور لگائیں۔

ڈی پی آئی سیکنڈری ایجوکیشن سکولز پنجاب نے مراسلے میں مزید کہا کہ سکول اوقات کار کے دوران کوئی بھی فرد مکمل خطرناک اور جزوی خطر ناک بلڈنگز کی طرف نہ جائے اور ان عمارتوں تک رسائی مکمل بند ہو، علاوہ ازیں سکول میں ہونے والے تعمیراتی کام کے اطراف بھی حفاظتی تدابیر اختیار کریں اور کسی بھی استاد یا ملازم کی ڈیوٹی لگائیں کہ وہ سکول اوقات میں حفاظتی تدابیر کی آ گاہی دیتا رہے، کسی بھی لاپرواہی یا نقصان کی صورت میں متعلقہ سی ای او ز، ڈی ای اوز ، ڈپٹی ڈی ای اوز، اے ای اوز اور سربراہ ادارہ جات ہی ذمہ دار ہوں گے اور ان کے خلاف کاروائی کی جاسکتی ہے۔