اسلام آباد (نیوز ڈیسک) پنجاب کے شہر چنیوٹ میں چوری کی ایک حیران کن واردات سامنے آئی ہے جس نے پولیس کو بھی حیرت میں ڈال دیا۔

میڈیا رپورٹس کے مطابق ملزم نے نہایت منفرد طریقہ اپناتے ہوئے اپنے گھر کے بیڈروم سے ایک دکان تک زیرِ زمین سرنگ کھود لی، جس کی لمبائی تقریباً 300 میٹر تھی۔ اس خفیہ راستے کے ذریعے وہ کئی ماہ تک دکان میں داخل ہو کر چاول چوری کرتا رہا۔بتایا جاتا ہے کہ دکان بند ہونے کے بعد ملزم سرنگ کے راستے اندر داخل ہوتا اور آہستہ آہستہ چاول کی بوریاں نکالتا رہا۔ دوسری جانب دکاندار مسلسل سامان کم ہونے پر پریشان تھا، تاہم جب 45 بوریاں غائب ہو گئیں تو معاملے کی حقیقت سامنے آئی۔

دکاندار کی اطلاع پر پولیس نے کارروائی کرتے ہوئے سرنگ کا سراغ لگایا جو ملزم کے گھر تک جا رہی تھی، تاہم ملزم فرار ہونے میں کامیاب ہو گیا۔ پولیس نے مقدمہ درج کر کے تفتیش شروع کر دی ہے۔