اسلام آباد (نیوز ڈیسک) تعلیمی بورڈ کی جانب سے رواں سال دسویں جماعت کے لازمی انگریزی پرچے کا ماڈل پیپر جاری کر دیا گیا ہے تاکہ طلبہ کو امتحانی پیٹرن سے آگاہ کیا جا سکے۔
ملک بھر میں عیدالفطر کے فوراً بعد نویں اور دسویں جماعت کے سالانہ امتحانات کا آغاز ہوگا، جس کے لیے طلبہ، تعلیمی ادارے اور امتحانی بورڈز اپنی تیاریاں مکمل کر رہے ہیں۔لاہور بورڈ کے شیڈول کے مطابق دسویں جماعت کا انگریزی کا لازمی پرچہ 30 مارچ کو دو شفٹوں، صبح اور شام، میں لیا جائے گا۔بورڈ آف سیکنڈری ایجوکیشن لاہور نے اپنے آفیشل پلیٹ فارم پر ماڈل پیپر فراہم کیا ہے تاکہ طلبہ کو سوالات کی نوعیت اور پرچے کے ڈھانچے کو بہتر انداز میں سمجھنے میں مدد مل سکے۔یہ پرچہ دو حصوں پر مشتمل ہوتا ہے، جن میں معروضی (آبجیکٹو) اور تفصیلی (سبجیکٹیو) حصے شامل ہیں، اور اسے حل کرنے کے لیے طلبہ کو مجموعی طور پر ڈھائی گھنٹے کا وقت دیا جاتا ہے۔ماڈل پیپر کے مطابق معروضی حصے میں 19 سوالات شامل ہوں گے جن کے مجموعی نمبر بھی 19 ہوں گے، جبکہ اس حصے کو حل کرنے کے لیے 20 منٹ مختص کیے گئے ہیں۔
اس سیکشن میں فعل کی درست شکل، الفاظ کے صحیح ہجے، جملوں کی درستی اور گرامر سے متعلق درست آپشن کے انتخاب جیسے سوالات شامل ہوں گے۔ماڈل پیپر طلبہ کو امتحان میں آنے والے سوالات کی اقسام کو سمجھنے اور بہتر تیاری کرنے میں مدد فراہم کرے گا۔
