لاہور (نیوز ڈیسک): معروف حکیم شہزاد، جنہوں نے مرحوم عامر لیاقت کی سابق اہلیہ دانیہ شاہ سے شادی کی تھی،
نے اپنی پانچویں شادی کی تصدیق کر دی ہے اور نئی دلہن کے ساتھ ایک ویڈیو بھی سوشل میڈیا پر شیئر کی ہے۔ ویڈیو میں دونوں میاں بیوی گاڑی کی پچھلی نشست پر موجود ہیں جہاں حکیم شہزاد اپنی اہلیہ سے مختلف سوالات کرتے دکھائی دیتے ہیں۔ انہوں نے اپنی بیوی سے پوچھا کہ سوشل میڈیا پر ان کی شادی پر تنقید ہو رہی ہے، خاص طور پر کم عمر ہونے کے حوالے سے، اس پر وہ کیا کہنا چاہیں گی۔ اس کے جواب میں دلہن نے کہا کہ وہ کسی کو وضاحت دینے کی پابند نہیں ہیں۔مزید گفتگو میں حکیم شہزاد نے سوال کیا کہ کیا اس شادی میں کسی قسم کی زبردستی شامل تھی؟ اس پر دلہن نے واضح کیا کہ ان کی شادی مکمل طور پر ان کی مرضی سے ہوئی ہے اور اس میں کسی قسم کا دباؤ شامل نہیں تھا۔ انہوں نے بتایا کہ ان کے والدین بھی اس موقع پر موجود تھے اور انہوں نے خوشی سے انہیں رخصت کیا۔
گفتگو کے دوران حکیم شہزاد نے یہ بھی پوچھا کہ انہیں اس شادی سے کیا حاصل ہوا، جس پر دلہن نے کہا کہ انہیں ایک ایسا شریکِ حیات ملا ہے جو ان کا ساتھ نبھانے والا ہے۔ انہوں نے مسکراتے ہوئے کہا کہ وہ خود کو ضدی اور تیز مزاج سمجھتی ہیں اور ان کے مطابق حکیم شہزاد ہی وہ شخص ہیں جو انہیں برداشت کر سکتے ہیں۔
