اسلام آباد (نیوز ڈیسک) کراچی کے علاقے مہران ٹاؤن میں ایک متنازع مجسمے کی موجودگی نے شہریوں میں تشویش پیدا کر دی۔ سوشل میڈیا پر اس مجسمے کی ویڈیو وائرل ہونے کے بعد مقامی افراد نے اس پر اعتراض اٹھایا۔

میڈیا رپورٹس کے مطابق مہران ٹاؤن میں مبینہ طور پر ’بعل‘ نامی مجسمہ نصب کیا گیا تھا جسے دیکھ کر علاقہ مکینوں نے احتجاج کیا۔ شہریوں کی شکایات کے بعد پولیس موقع پر پہنچی اور مجسمے کو اپنی تحویل میں لے کر تھانے منتقل کر دیا۔پولیس حکام کے مطابق یہ مجسمہ فوم سے تیار کیا گیا ہے اور تاحال اس کے خالق یا مجسمہ ساز کا پتہ نہیں چل سکا۔ پولیس کا کہنا ہے کہ مجسمہ بنانے والے شخص کی تلاش جاری ہے تاکہ اس سے اس کے پس منظر اور مقصد کے بارے میں معلومات حاصل کی جا سکیں۔حکام کے مطابق مجسمہ ساز کے سامنے آنے کے بعد ہی اس معاملے میں مزید قانونی کارروائی کا فیصلہ کیا جائے گا۔

واضح رہے کہ ایران میں گزشتہ برس 11 فروری کو اسی طرح کے ’بعل‘ مجسموں کو نذر آتش کیا گیا تھا، جہاں بعض حلقے اسے شیطانیت اور صیہونیت کی علامت قرار دیتے ہیں۔