اسلام آباد (نیوز ڈیسک)شوال المکرم کا چاند دیکھنے کے لیے مرکزی رویتِ ہلال کمیٹی کا اجلاس 19 مارچ کو منعقد ہوگا۔
میڈیا رپورٹس کے مطابق اجلاس کی صدارت مرکزی رویتِ ہلال کمیٹی کے چیئرمین مولانا عبدالخبیر آزاد کریں گے۔ اس اجلاس میں مختلف مکاتبِ فکر کے علما، محکمہ موسمیات کے حکام اور دیگر متعلقہ اداروں کے نمائندے بھی شریک ہوں گے۔اجلاس کے دوران ملک کے مختلف علاقوں سے موصول ہونے والی چاند نظر آنے کی شہادتوں کا تفصیلی جائزہ لیا جائے گا اور انہی شواہد کی بنیاد پر شوال کے چاند سے متعلق فیصلہ کیا جائے گا۔
ادھر زونل رویتِ ہلال کمیٹیوں کے اجلاس بھی اپنے اپنے شہروں میں منعقد کیے جائیں گے۔ یہ کمیٹیاں اپنے علاقوں میں چاند کی رویت سے متعلق موصول ہونے والی اطلاعات اور شہادتوں کی جانچ پڑتال کے بعد اپنی رپورٹ مرکزی کمیٹی کو ارسال کریں گی، جس کے بعد مرکزی رویتِ ہلال کمیٹی عیدالفطر کے چاند کی رویت کے حوالے سے باضابطہ اعلان کرے گی۔
