لاہور (این این آئی) یوم شہادت حضرت علی المرتضی کی آمد کے موقع پر پنجاب پولیس کا سکیورٹی پلان فائنل کر لیا گیا ،
لاہور سمیت صوبہ بھر میں 30ہزار سے زائد پولیس افسران و اہلکار عزاداری جلوسوں،مجالس کی سکیورٹی پر تعینات ہوں گے۔ اس حوالے سے آئی جی پنجاب عبدالکریم نے بتایا کہ موجودہ سرحدی صورتحال کے تناظر میں یوم شہادت حضرت علی پر سکیورٹی انتہائی سخت ہو گی، صوبائی دارالحکومت میں عزاداری جلوسوں، مجالس کی سکیورٹی پر 08ہزار سے زائد افسران و اہلکار مامور ہوں گے ، 217عزاداری جلوسوں کی سکیورٹی پر 20ہزار، 994مجالس پر 10ہزار سے زائد افسران و اہلکار فرائض انجام دیں گے، مجالس و عزاداری جلوسوں کے شرکا کی چیکنگ کے لئے2029میٹل ڈٹیکٹرز، 297واک تھرو گیٹس استعمال کئے جائیں گے، سیف سٹیز اتھارٹی، ضلعی انتظامیہ کے کیمروں کی مدد سے عزاداری جلوسوں، مجالس کی مسلسل مانیٹرنگ کی جائے گی۔انہوں نے بتایا کہ لاہور سمیت پنجاب بھر میں کیٹیگری اے کے 32عزاداری جلوس برآمد، 67مجالس منعقد ہونگی، سنٹرل پولیس آفس کے کنٹرول اینڈ مانیٹرنگ روم سے تمام تر سرگرمیوں کی نگرانی کی جائے گی، پولیس انتہائی الرٹ رہے، عزاداری جلوسوں، مجالس کے شرکا کی مکمل چیکنگ یقینی بنائیں۔
آئی جی پنجاب نے کہا کہ خواتین عزاداروں کی سکیورٹی چیکنگ کیلئے لیڈی پولیس اہلکار تعینات کی جائیں گی، عزاداری جلوسوں میں سادہ لباس میں کمانڈوز، روٹس کی چھتوں پر سنائپرز تعینات ہوں گے، صوبہ بھر میں متبادل راستوں سے ٹریفک کی روانی برقرار رکھنے کیلئے خصوصی انتظامات کئے جائیں، ڈولفن سکواڈ، پیرو، سپیشل برانچ، سی ٹی ڈی سمیت تمام فیلڈ فارمیشنز یوم شہادت حضرت علی کے سکیورٹی انتظامات میں مشترکہ لائحہ عمل اپنائیں، آر پی اوز، سی پی اوز، ڈی پی اوز عزاداری جلوسوں، مجالس کے سکیورٹی انتظامات خود چیک کریں۔
