اسلام آباد(نیوز ڈیسک ) علاقائی صورتحال میں بڑھتی ہوئی کشیدگی کے باعث سائبر حملوں کے امکانات میں اضافہ ہو گیا ہے،
جس پر نیشنل سرٹ (ایمرجنسی رسپانس ٹیم) نے تازہ سیکیورٹی ایڈوائزری جاری کر دی ہے۔ادارے کی جانب سے حساس سرکاری محکموں کو فوری طور پر حفاظتی اقدامات سخت کرنے کی ہدایت کی گئی ہے۔ اعلامیے میں خبردار کیا گیا ہے کہ حکومتی، دفاعی اور مالیاتی شعبے ممکنہ طور پر سائبر حملہ آوروں کا ہدف بن سکتے ہیں۔ ڈیپ فیک ویڈیوز، اسپیئر فشنگ اور ڈی ڈی او ایس جیسے حملوں کے خدشات بھی ظاہر کیے گئے ہیں۔ایڈوائزری کے مطابق سرکاری سوشل میڈیا اکاؤنٹس کے ہیک ہونے کا خطرہ موجود ہے، جبکہ بینکنگ اور مالیاتی نظام کو رینسم ویئر حملوں کا سامنا کرنا پڑ سکتا ہے۔ سرکاری ملازمین اور عام شہریوں کو مشتبہ لنکس اور غیر معروف ایپلی کیشنز سے دور رہنے کی تلقین کی گئی ہے۔
نیشنل سرٹ نے ملٹی فیکٹر آتھنٹیکیشن کو لازمی بنانے اور تمام سسٹمز کو فوری اپڈیٹ رکھنے کی ہدایت کی ہے۔ ساتھ ہی صارفین کو غیر تصدیق شدہ ایپس ڈاؤن لوڈ کرنے سے گریز کرنے کا مشورہ دیا گیا ہے۔ جعلی خبروں اور ڈیپ فیک مواد کے ذریعے نفسیاتی دباؤ ڈالنے کی کوششوں سے بھی خبردار کیا گیا ہے۔مزید برآں آئی ٹی ٹیموں کو فوری طور پر تھریٹ ہنٹنگ اور سیکیورٹی آڈٹ مکمل کرنے کی سفارش کی گئی ہے تاکہ کسی بھی ممکنہ خطرے کا بروقت سدباب کیا جا سکے۔
