اسلام آباد (نیوز ڈیسک) کراچی میں پولیس نے ایک ایسے پیشہ ور گداگر کو حراست میں لے لیا جس کے قبضے سے بڑی رقم برآمد ہوئی، جس پر شہری بھی حیران رہ گئے۔

ملزم کا تعلق جنوبی پنجاب کے شہر بہاولپور سے بتایا گیا ہے۔پولیس کے مطابق انسدادِ گداگری مہم کے دوران گلشنِ اقبال بلاک 3 میں کارروائی کی گئی جہاں ایک شخص کو گرفتار کیا گیا۔ تلاشی لینے پر اس کے بیگ سے ایک لاکھ 10 ہزار روپے نقد رقم برآمد ہوئی۔

رپورٹس کے مطابق ملزم شہر کے مختلف علاقوں، جن میں گلشنِ معمار، گلشنِ اقبال، گلستانِ جوہر اور ناظم آباد شامل ہیں، میں بھیک مانگتا تھا۔ برآمد ہونے والی رقم مختلف مالیت کے نوٹوں پر مشتمل تھی جنہیں 10، 50، 100، 500، 1000 اور 5000 روپے کی الگ الگ گڈیوں کی صورت میں ترتیب دیا گیا تھا۔

پولیس حکام کا کہنا ہے کہ شہر میں پیشہ ور گداگروں کے خلاف کارروائیاں جاری رہیں گی تاکہ منظم بھیک مانگنے کے رجحان کی حوصلہ شکنی کی جا سکے۔