اسلام آباد (نیوز ڈیسک)  راولپنڈی کے ہولی فیملی ہسپتال میں وینٹی لیٹر میسر نہ آنے کے باعث پاکستان مسلم لیگ (ن) کے ایک مقامی عہدیدار انتقال کر گئے۔

ذرائع کے مطابق انجم اقبال مغل کی طبیعت صبح تقریباً سات بجے اچانک بگڑ گئی جس پر انہیں فوری طور پر ہولی فیملی ہسپتال منتقل کیا گیا۔ اہل خانہ کی جانب سے انہیں وینٹی لیٹر فراہم کرنے کی مسلسل اپیلیں کی جاتی رہیں، تاہم سہولت دستیاب نہ ہو سکی۔نجی ٹی وی چینل 24 نیوز کی رپورٹ کے مطابق پارٹی کے مقامی کارکنوں نے راولپنڈی کی سیاسی قیادت سے متعدد بار رابطہ کرنے کی کوشش کی، لیکن کسی رہنما نے فون کال موصول نہیں کی۔ مناسب طبی امداد نہ ملنے کے باعث انجم اقبال مغل دم توڑ گئے۔

مرحوم تقریباً دو دہائیوں سے راولپنڈی میں پاکستان مسلم لیگ (ن) کی سرگرمیوں میں متحرک تھے اور مختلف سیاسی اجتماعات و جلسوں کے انعقاد میں اہم کردار ادا کرتے رہے تھے۔