چارسدہ (این این آئی) گھریلو تنازع پر مسجد میں گولیاں چلنے سے 4افراد جاں بحق اور 2زخمی ہو گئے۔
ایس ایچ او تھانہ بٹگرام نے بتایا کہ دونوں فریقین کے درمیان خواتین کے معاملے پر 30 سال پرانا تنازع چلا آ رہا تھا، اس دیرینہ دشمنی کو ختم کرنے اور صلح کی کوشش کے لیے دونوں گروپس کے افراد مقامی مسجد میں جمع ہوئے تھے۔پولیس ذرائع کے مطابق تصفیے کے دوران بات چیت تلخ کلامی میں بدل گئی اور دیکھتے ہی دیکھتے مسجد کے تقدس کو پامال کرتے ہوئے فریقین نے ایک دوسرے پر اندھا دھند گولیاں چلا دیں۔فائرنگ کے تبادلے میں دونوں گروپوں کے دو دو افراد موقع پر ہی دم توڑ گئے تاہم واقعے میں 2 افراد شدید زخمی بھی ہوئے. جنہیں فوری طبی امداد کیلئے ہسپتال منتقل کر دیا گیا ہے۔واقعے کی اطلاع ملتے ہی پولیس کی بھاری نفری جائے وقوعہ پر پہنچ گئی اور علاقے کو گھیرے میں لے لیا، پولیس نے لاشوں کو پوسٹ مارٹم کیلئے منتقل کر دیا ہے اور مفرور ملزمان کی گرفتاری کے لیے مختلف مقامات پر چھاپے مارے جا رہے ہیں۔
