اسلام آباد (نیوز ڈیسک) سعودی عرب کی وزارتِ حج و عمرہ نے زائرین کی آسانی کے لیے ایک جامع ’’عمرہ و زیارت گائیڈ‘‘ متعارف کرا دی ہے،
جو اردو سمیت 16 مختلف زبانوں میں دستیاب ہے تاکہ مختلف ممالک سے آنے والے افراد اپنی زبان میں ضروری معلومات حاصل کر سکیں۔سعودی خبر رساں ادارے کے مطابق اس رہنما کتاب میں عمرہ اور زیارت کے تمام مراحل کی مرحلہ وار وضاحت کی گئی ہے۔ اس میں سفر کی تیاری، ویزا حاصل کرنے کے طریقۂ کار، نسک پلیٹ فارم سے عمرہ پرمٹ لینے، حرمین شریفین میں آمد و رفت کے انتظامات اور واپسی کے مراحل تک کی مکمل رہنمائی شامل ہے۔رپورٹ کے مطابق گائیڈ کو مزید مؤثر بنانے کے لیے اس میں تصویری وضاحتیں، مختلف مقامات کے نقشے اور معلوماتی ویڈیوز بھی فراہم کیے گئے ہیں تاکہ زائرین کو عملی طور پر سمجھنے میں سہولت ہو اور انہیں دورانِ سفر کسی دشواری کا سامنا نہ کرنا پڑے۔
ڈیجیٹل شکل میں جاری اس گائیڈ میں احرام باندھنے کے اصول، طواف اور سعی کی ادائیگی، حرمین شریفین کے آداب اور وہاں دستیاب بنیادی سہولیات سے متعلق اہم معلومات بھی شامل کی گئی ہیں۔ وزارتِ حج و عمرہ کا کہنا ہے کہ اس اقدام کا مقصد عمرہ زائرین کو بہتر انداز میں رہنمائی فراہم کرنا ہے تاکہ وہ اپنے روحانی سفر کے دوران فراہم کردہ خدمات سے بھرپور فائدہ اٹھا سکیں۔
