اسلام آباد (نیوز ڈیسک )خواتین کو ٹیکنالوجی کے شعبے میں آگے بڑھانے کے لیے خیبر پختونخوا انفارمیشن ٹیکنالوجی بورڈ نے ڈیجیٹل انٹرن شپ پروگرام 2025–26 متعارف کرا دیا ہے،
جس کے تحت منتخب امیدواروں کو چھ ماہ تک باقاعدہ معاوضے کے ساتھ تربیت دی جائے گی۔ اس منصوبے کا مقصد خواتین کو جدید ڈیجیٹل مہارتیں سکھانا اور عملی میدان میں تجربہ فراہم کرنا ہے۔اس پروگرام میں شامل انٹرنز کو آرٹیفیشل انٹیلی جنس، یو آئی/یو ایکس ڈیزائن، ویب اور ایپ ڈویلپمنٹ، گرافک ڈیزائن اور ڈیجیٹل مارکیٹنگ سمیت مختلف جدید شعبوں میں کام سیکھنے کا موقع ملے گا۔ منتخب امیدواروں کو تربیت کے دوران ہر ماہ 30 ہزار روپے وظیفہ بھی دیا جائے گا۔منتخب خواتین کو آئی ٹی پارکس میں قائم کمپنیوں، ڈیجیٹل ٹرانسفارمیشن یونٹس اور متعلقہ دفاتر میں تعینات کیا جائے گا تاکہ وہ صنعت سے جڑے عملی تقاضوں کو سمجھ سکیں۔ اس اقدام کا بنیادی مقصد خواتین کی ڈیجیٹل معیشت میں شمولیت بڑھانا، ان کی تکنیکی صلاحیتوں کو نکھارنا اور انہیں مستقبل کے ٹیکنالوجی کیریئر کے لیے تیار کرنا ہے۔
دلچسپی رکھنے والی امیدوار سرکاری پورٹل کے ذریعے درخواست جمع کرا سکتی ہیں، جبکہ اپلائی کرنے کی آخری تاریخ 13 مارچ 2026 مقرر کی گئی ہے۔
