کراچی(این این آئی)محکمہ موسمیات نے ایک مغربی لہر کے زیر اثر کراچی میںآج( منگل)گرج چمک کے ساتھ بارش کی پیشگوئی کی ہے جبکہ شہر میں معمول سے تیز گرد آلود ہوائیں بھی چل سکتی ہیں اور بعض اوقات حدِ نگاہ متاثر ہونے کا خدشہ ہے۔
محکمہ موسمیات کے مطابق سسٹم کے زیر اثر کراچی میں17فروری کو گرج چمک کیساتھ بارش کا امکان ہے جبکہ بارش کے ساتھ معمول سے تیز گردآلود ہوائیں چلنے کا بھی امکان ہے۔محکمہ موسمیات کے مطابق دادو، حیدرآباد، ٹھٹھہ، بدین، جامشورو، لاڑکانہ، جیکب آباد اور خیرپور کراچی ڈویژن میں گرج چمک کے ساتھ بارش کا امکان ہے۔محکمہ موسمیات کے مطابق پیرکو شہر کا کم سے کم درجہ حرارت 16 ڈگری سینٹی گریڈ اور ہوا میں نمی کا تناسب 86 فیصد ریکارڈ کیا گیا۔محکمہ موسمیات کے مطابق شہر میں نمی بڑھنے کی وجہ سے صبح کے اوقات میں ہلکی دھند ریکارڈ کی گئی جبکہ ہوا میں نمی کا تناسب 86 فی صد رہااورشمال مشرقی سمت سے ہوائیں ہلکی رفتار سے چل رہی ہیں۔
ترجمان محکمہ موسمیات انجم نزیر کے مطابق مغربی ہوائوں کا سلسلہ بلوچستان کو متاثر کر رہا ہے، جس کے باعث کراچی میں معتدل درجے کی بارش یا بوندا باندی متوقع ہے۔ترجمان کے مطابق 15 رمضان کے بعد شہر میں درجہ حرارت میں 3 سے 4 ڈگری سینٹی گریڈ اضافے کا امکان ہے۔
