اسلام آباد (نیوز ڈیسک) پاکستان آرمی کے سکھ افسر ہرچرن سنگھ کو ترقی دے کر لیفٹیننٹ کرنل کے عہدے پر فائز کر دیا گیا ہے،

اور وہ اس رینک تک پہنچنے والے پاک فوج کے پہلے سکھ افسر بن گئے ہیں۔ہرچرن سنگھ 1987 میں ننکانہ صاحب میں پیدا ہوئے، جو سکھ مذہب کے بانی بابا گرو نانک کے جنم استھان کے طور پر معروف ہے۔ وہ نہ صرف پاک فوج میں کمیشن حاصل کرنے والے پہلے سکھ افسر ہیں بلکہ اس وقت بلوچستان رجمنٹ میں اپنی خدمات سرانجام دے رہے ہیں۔ان کی اس نمایاں کامیابی کو سوشل میڈیا اور مختلف حلقوں میں سکھ برادری کے لیے اعزاز قرار دیا جا رہا ہے، جبکہ ملک بھر سے شہری انہیں مبارکباد اور نیک تمنائیں پیش کر رہے ہیں۔تجزیہ کاروں کے مطابق یہ پیش رفت پاک فوج میں مذہبی رواداری، قومی یکجہتی اور مختلف برادریوں کی نمائندگی کو اجاگر کرنے کی ایک مثبت مثال بھی سمجھی جا رہی ہے۔