کراچی (این این آئی)ڈیفنس پولیس نے جدید تکنیکی ذرائع کا استعمال کرتے ہوئے خاتون کے قتل میں ملوث نامزد ملزم کو گرفتار کر لیا ہے۔
پولیس کے مطابق تھانہ ڈیفنس کی حدود میں واقع قیوم آباد کے ایک گھر میں میاں بیوی مقیم تھے، جہاں گھریلو ناچاقی کے باعث افسوسناک واقعہ پیش آیا۔ پولیس کا کہنا ہے کہ مقتولہ عشنا کو اس کے شوہر قیوم ولد محبوب نے 25 دسمبر 2025 کو گھریلو جھگڑے کے دوران قتل کیا۔قتل کے بعد ملزم مقتولہ کی لاش اپنے گاؤں لے گیا اور وہاں تدفین کر دی۔ پولیس کے مطابق غسل کے دوران مقتولہ کے چہرے پر مشتبہ نشانات دیکھے گئے، جس پر اہلِ خانہ کو شبہ ہوا۔ بعد ازاں اہلِ خانہ کراچی واپس آئے اور جب ملزم سے واقعے سے متعلق پوچھ گچھ کی گئی تو وہ کوئی تسلی بخش جواب نہ دے سکا۔ اسی دوران ملزم گاؤں جانے کا بہانہ بنا کر روپوش ہو گیا۔واقعے کا مقدمہ درج ہونے کے بعد ڈیفنس پولیس کے انویسٹی گیشن آفیسر سب انسپکٹر قسیم تنولی نے جدید تکنیکی ذرائع اور مسلسل محنت کے ذریعے ملزم کو ٹریس کر کے گرفتار کر لیا۔پولیس کے مطابق گرفتار ملزم قیوم ولد محبوب نے ابتدائی تفتیش کے دوران اعترافِ جرم کرتے ہوئے بتایا کہ اس نے گھریلو جھگڑے کے دوران اپنی اہلیہ کو قتل کیا۔
انویسٹی گیشن آفیسر قسیم تنولی کا کہنا ہے کہ ملزم سے مزید تفتیش جاری ہے اور کیس میں اہم انکشافات متوقع ہیں۔
