اسلام آباد (نیوز ڈ یسک) صوبائی وزیر اطلاعات پنجاب عظمیٰ بخاری نے واضح کیا ہے کہ بسنت کا سلسلہ ختم ہو چکا ہے اور اب پتنگ بازی کی کسی کو اجازت نہیں دی جائے گی۔
انہوں نے والدین پر زور دیا کہ وہ اپنے بچوں کی سرگرمیوں پر کڑی نظر رکھیں، کیونکہ پتنگ اڑانے والوں کے خلاف سخت کارروائی عمل میں لائی جائے گی۔نجی ٹی وی چینل کے مطابق عظمیٰ بخاری نے محفوظ بسنت کے انعقاد پر لاہور کے شہریوں، ملک بھر کے عوام اور بیرونِ ملک مقیم پاکستانیوں کا شکریہ ادا کیا۔ ان کا کہنا تھا کہ ’’شکریہ لاہور، شکریہ پاکستان اور شکریہ اوورسیز پاکستانی‘‘ جنہوں نے اس موقع پر ذمہ داری کا مظاہرہ کیا۔انہوں نے غیر ملکی مہمانوں اور سفارتی شخصیات کا بھی شکریہ ادا کرتے ہوئے کہا کہ وزیراعلیٰ پنجاب مریم نواز نے لاہور سمیت پورے صوبے کے عوام کے دل جیت لیے ہیں۔ ان کے مطابق لاہوری محفوظ اور کامیاب بسنت منانے پر مبارکباد کے مستحق ہیں۔ عظمیٰ بخاری نے کہا کہ الحمدللہ بسنت اس بار انتہائی محفوظ انداز میں منائی گئی اور امریکہ، برطانیہ اور مشرق وسطیٰ سے بھی لوگ اس موقع پر لاہور پہنچے۔ شہریوں نے حکومتی ضوابط اور ہدایات پر مکمل عملدرآمد کیا۔صوبائی وزیر اطلاعات نے پولیس، ریسکیو، ضلعی انتظامیہ اور دیگر متعلقہ اداروں کی کارکردگی کو سراہتے ہوئے کہا کہ بسنت کو محفوظ بنانے میں تمام اداروں نے بھرپور محنت اور ذمہ داری کا مظاہرہ کیا۔انہوں نے مزید کہا کہ پاکستانی عوام نے نفرت، انتشار اور احتجاج کی سیاست کو مسترد کر دیا ہے اور ترقی، امن اور خوشحالی کے حق میں کھڑے ہو گئے ہیں۔
ان کا کہنا تھا کہ ملک کو کمزور کرنے والے عناصر اپنے منطقی انجام تک پہنچ چکے ہیں۔
