لاہور( این این آئی) پرونشل ڈیزاسٹرمینجمنٹ اتھارٹی کی جانب سے بارش اور برف باری کا الرٹ جاری کردیا گیا،

اس کے علاوہ مری، گلیات اورگردونواح میں برف اری اوربارش کاامکان ہے۔پی ڈی ایم اے پنجاب کے مطابق 8 سے 10 فروری تک پنجاب کے بالائی علاقوں میں بارش وبرف باری کا امکان ہے۔اس کے علاوہ پنجاب کے بیشتر اضلاع میں بھی بارش کا امکان ہے، الرٹ کے مطابق 9 سے 10 فروری مری، گلیات اورگردونواح میں برف باری اور بارش کا امکان ظاہر کیا گیا ہے۔محکمہ موسمیات کی جانب سے پنجاب کے جنوبی اضلاع میں بارش اور ژالہ باری کی پیشگوئی کی گئی ہے،راولپنڈی، اٹک، جہلم، سرگودھا، میانوالی، بھکر، لیہ، ڈیرہ غازی خان، جھنگ، نورپور تھل، گجرات، گوجرانوالہ،حافظ آباد، منڈی بہائوالدین اور سیالکوٹ میں بھی بارش کا امکان ہے۔ڈی جی پی ڈی ایم اے عرفان علی کاٹھیا نے ہدایات جاری کی ہیں کہ ایمرجنسی کنٹرول رومز میں اسٹاف کو 24 گھنٹے الرٹ رکھا جائے، ریسکیو1122کی ڈائزاسٹر رسپانس ٹیموں کو ہائی الرٹ رکھا جائے۔

انہوں نے اپیل کی ہے کہ شہری خراب موسم میں غیر ضروری سفر سے گریز کریں، مری میں سیاح احتیاطی تدابیر اختیار کریں اور ہدایات پر لازمی عمل کریں۔