اسلام آباد (نیوز ڈیسک) اسلام آباد میں ہونے والے خودکش دھماکے کے بعد امریکا نے پاکستان کے لیے نئی سیکیورٹی ایڈوائزری جاری کر دی ہے۔
امریکی محکمہ خارجہ کی جانب سے جاری بیان میں پاکستان کا سفر کرنے والے امریکی شہریوں کو خبردار کیا گیا ہے کہ وہ موجودہ حالات میں غیر معمولی احتیاط برتیں۔ ایڈوائزری میں کہا گیا ہے کہ عوامی اجتماعات اور ہجوم والی جگہوں سے دور رہا جائے اور اپنی ذاتی سلامتی کے انتظامات کا ازسرِ نو جائزہ لیا جائے۔محکمہ خارجہ نے امریکی شہریوں کو ہدایت کی ہے کہ وہ مقامی میڈیا کے ذریعے سیکیورٹی صورتحال سے متعلق تازہ معلومات پر نظر رکھیں۔ اس کے ساتھ ساتھ غیر ضروری نقل و حرکت سے گریز، کم نمایاں رہنے اور ہر وقت شناختی دستاویزات ساتھ رکھنے پر بھی زور دیا گیا ہے۔
بیان میں مزید کہا گیا ہے کہ امریکی شہری قانون نافذ کرنے والے اداروں کے ساتھ مکمل تعاون کریں اور پاکستان میں موجودہ سیکیورٹی حالات کے پیش نظر حفاظتی تدابیر پر سختی سے عمل کریں۔
