اسلام آباد (این این آئی) رہنماء جمعیت علمائے اسلام حافظ حمد اللہ نے کہا ہے کہ آئین میں واضح طور پر درج ہے قرآن و سنت کیخلاف کوئی قانون سازی نہیں کی جا سکتی۔ جاری بیان میں حافظ حمد اللہ نے کہا کہ اگر پارلیمنٹ قرآن و سنت کے منافی قوانین منظور کرے تو یہ آئین سے انحراف کے مترادف ہے، پارلیمنٹ میں بیٹھ کر آئین کی خلاف ورزی کرنے والوں پر آرٹیکل 6کا اطلاق ہونا چاہیے۔

انہوں نے کہا کہ مولانا فضل الرحمان جو کچھ کر رہے ہیں وہ آئین کے مطابق کر رہے ہیں ، میں مولانا کو تجویز دے رہا ہوں کہ چاروں صوبوں میں اجتماعی شادیوں کا انعقاد کریں خواہ وہ 18سال سے کم عمر ہی کیوں نہ ہوں۔حافظ حمد اللہ نے کہا کہ جو قانون قرآن و سنت کیخلاف ہو اس قانون کو ہم تسلیم نہیں کریں گے ، اگرچہ میں دوسری شادی کے موڈ میں نہیں ہوں لیکر اگر مجھے غصہ آیا اور میں نے فیصلہ کیا تو میں بھی 16سالہ لڑکی سے شادی کروں گا۔