حسن ابدال(این این آئی) حسن ابدال کی حدود میںگھریلو تنازع پر اندھا دھند فائرنگ سے 5 افراد جاں بحق جبکہ ایک شدید زخمی ہوگیا،ملزم نے ساس ، سسر اپنے دو بچوں کو موت کی نیند سلانے کے بعد خودکشی کرلی، ملزم کی بیوی بھاگ کر اپنی جان بچانے میں کامیاب ہوگئی، پولیس اور ریسکیو کی ٹیمیں موقع پر پہنچ گئیں ، لاشیں اور زخمی کوہسپتال منتقل کردیاگیا۔ تفصیلات کے مطابق تھانہ صدر حسن ابدال کی حدود میں واقع گاؤں پنڈمہری میں گھریلو تنازع کے دوران فائرنگ کے دلخراش واقعہ میں داماد ناصر محمود سکنہ ہری پور نے اپنے سسرال میں گھس کر آتشیں اسلحہ سے اندھا دھند فائرنگ کردی جس کے نتیجہ میں 48 سالہ ساس نسیم اختر زوجہ نثار اور ملزم کی اپنی 2 سالہ معصوم بیٹی کائنات موقع پر ہی جاں بحق ہو گئے۔
واقعے میں سسر نثار ولد اسلم اور 5 سالہ بیٹی فلک ناز شدید زخمی ہو گئے، جنہیں فوری طور پر قریبی ہسپتال منتقل کیا گیا جہاں دونوں زخموں کی تاب نہ لاتے ہوئے جاں بحق ہو گئے، ملزم نے فائرنگ کے بعد خود کشی کرکے اپنی زندگی کا بھی خاتمہ کر دیا۔ ملزم کی بیوی نے بھاگ کر اپنی جان بچھائی۔ افسوسناک واقعہ کی اطلاع ملتے ہی پولیس کی بھاری نفری ، کرائم سین یونٹ اور رسیکیو 1122 کی ٹیمیں موقع پر پہنچ گئیں اور لاشوں اور ایک زخمی کو تحصیل ہیڈ کوارٹر ہسپتال حسن ابدال منتقل کر دیا۔ پولیس نے واقعہ کا تمام پہلوؤں سے جائزہ لیتے ہوئے تحقیقات کا آغاز کر دیا۔ افسوسناک واقعہ میں ملزم سمیت 5 افراد کے جاں بحق ہونے پر علاقہ بھر کی فضاء سوگوار ہوگئی۔
