اسلام آباد (این این آئی)حکومت نے الیکٹرک بائیکس، رکشوں اور لوڈرز کے لیے متعارف کرائی گئی خصوصی سکیم پر باقاعدہ عمل درآمد شروع کر دیا ۔ وزیراعظم کی الیکٹرک وہیکل اڈاپشن اسکیم کے تحت پہلے مرحلے میں منظور شدہ درخواست گزاروں کو سبسڈی کی رقم منتقل کر دی گئی ہے۔انجینئرنگ ڈویلپمنٹ بورڈ کے مطابق رواں مالی سال کے دوران تقریبا 9ارب روپے کی سبسڈی دی جائے گی جبکہ حکومت سال 2030ء تک 100ارب روپے سے زائد کی سبسڈی فراہم کرنے کا منصوبہ رکھتی ہے۔

دستاویزات کے مطابق فیز ون میں 41 ہزار الیکٹرک گاڑیوں پر سبسڈی دی جا رہی ہے جن میں 40ہزار الیکٹرک بائیکس اور ایک ہزار الیکٹرک رکشے اور لوڈرز شامل ہیں۔ اس مرحلے میں اسٹیٹ بینک کے ذریعے سبسڈی کی رقم براہ راست درخواست گزاروں کے بینک اکانٹس میں منتقل کی جا رہی ہے۔الیکٹرک بائیک پر 80ہزار روپے تک سبسڈی دی جا رہی ہے جبکہ بینک لیز اسکیم کے تحت الیکٹرک بائیکس اور رکشے آسان اقساط پر فراہم کیے جا رہے ہیں۔ دوسرے مرحلے میں مزید 78ہزار سے زائد الیکٹرک وہیکلز کو سبسڈی دینے کا منصوبہ بھی تیار کر لیا گیا ہے۔حکام کے مطابق سکیم کا مقصد سستی، ماحول دوست سواری کو فروغ دینا اور ایندھن پر انحصار کم کرنا ہے۔ واضح رہے کہ صرف رجسٹرڈ الیکٹرک گاڑیاں ہی اس سبسڈی سکیم کی اہل ہوں گی۔