لاہور( این این آئی) رکن قومی اسمبلی شیر افضل مروت نے شہباز گل پر سکھ برادری کی جانب سے کرتار پور رہداری کے افتتاح پر تحفے میں ملنے والے سونے کے لوٹے کی چوری کا الزام عائد کیا ہے۔نجی ٹی وی سے گفتگو میں شیر افضل مروت نے کہا کہ پی ٹی آئی والوں نے لوٹا چوروں کو رہنما بنایا ہوا ہے، شہباز گل بانی پی ٹی آئی سے ملاقات کرانے کے نام پر پیسے لیتے تھے، کرتار پور راہداری کے افتتاح پر سکھ برادری نے سونے کا لوٹا بطور تحفہ شہباز گل کو دیا۔

شیرافضل مروت کے مطابق شہبازگل نے بشری بی بی کو پہنچانے کے نام پر سونے کا لوٹا اٹھایا لیکن یہ لوٹا وہاں نہیں پہنچا، سونے کے لوٹے کی تصاویر بھی لی گئی تھیں، سونے کا لوٹا پیٹرولیم انڈسٹری کے ٹائیکون کو فروخت کیا گیا، شہباز گل کو سونے کے لوٹے اور 2 موبائل کی چوری پر نکالا گیا،پی ٹی آئی والوں نے لوٹا چوروں کو رہنما بنایا ہوا ہے۔انہوں نے مزید کہا کہ شہباز گل بانی پی ٹی آئی سے ملاقات کرانے کے نام پر پیسے لیتے تھے۔انہوںنے کہا کہ پی ٹی آئی کے7 ،8اکابرین کوبانی کے پاس جانے دیں توبانی حیران ہوجائیں گے، علی ظفر کے بغض میں علامہ راجہ ناصر عباس کو لایاگیا، بیرسٹرگوہر،اسدقیصر کے بغض میں محموداچکزئی کو لایاگیا۔