کراچی (این این آئی) بلدیہ سے بارود بھرا ٹرک پکڑے جانے کے بعد گرفتار دہشت گردوں کی نشاندہی پر کئی خواتین کو گرفتار کرلیا گیا۔تفصیلات کے مطابق کراچی کے علاقے بلدیہ سے دھماکا خیز مواد برآمد ہونے کے بعد قانون نافذ کرنے والے اداروں کی جانب سے چھاپہ مار کارروائیاں جاری ہیں۔ذرائع نے بتایا گرفتار دہشت گردوں کی نشاندہی پر متعدد افراد کو حراست میں لیا گیا ، حراست میں لیے گئے افراد میں خواتین بھی شامل ہیں۔ذرائع کا کہنا ہے کہ دھماکا خیز مواد کی تیاری میں استعمال ہونے والا سامان شہر کے مختلف علاقوں سے خریدا گیا تھا، جبکہ ہائی ایکسپلوزو مواد انتہائی مہارت سے تیار کیا گیا تھا، جسے ڈیفیوز کرنے میں مشکلات پیش آئیں۔
ذرائع نے کہا کہ ڈیفیوز کرنے والے افسران نے اپنی جان خطرے میں ڈال کر نہ صرف بم کو ناکارہ بنایا بلکہ ارد گرد کی آبادی کو بھی بچایا۔ذرائع نے مزید بتایا گیا ہے کہ ملزمان کی جانب سے دہشت گردی کے لیے کئی ماہ سے منصوبہ بندی جاری تھی اور وہ شہر کی معاشی سرگرمیوں کو سبوتاژ کرنا چاہتے تھے۔پولیس کے مطابق کراچی کے مخصوص علاقوں میں مشکوک افراد کی نقل و حرکت کی نگرانی بھی جاری ہے، جبکہ تحقیقات کا دائرہ مزید وسیع کر دیا گیا ہے۔
