لاہور(این این آئی)محکمہ موسمیات نے ملک بھر کے موسم بارے اہم پیش گوئی کر دی۔محکمہ موسمیات نے ملک کے مغربی اور بالائی علاقوں میں 20سے 22دسمبر کے دوران بارشوں کی پیش گوئی کی ہے۔رپورٹ کے مطابق مغربی ہوایوں کا سلسلہ 19دسمبر کو بلوچستان میں داخل ہوگا، اس دوران گرج چمک کے ساتھ بارش پہاڑوں پر برفباری متوقع ہے۔محکمہ موسمیات کے مطابق بلوچستان میں 19اور 20دسمبر میں بارش اور برفباری کا امکان ہے، خیبر پختونخوا ،گلگت بلتستان ،کشمیر میں بارش بھی ہو سکتی ہے۔

رپورٹ کے مطابق 19دسمبر کو چترال، دیر، سوات، پشاور ، چارسدہ، نوشہرہ، سمیت مختلف اضلاع میں بارش کا امکان ہے، اس دوران بعض مقامات پر شدید برفباری کی بھی توقع ہے۔محکمہ موسمیات کے مطابق اسلام آباد اور راولپنڈی میں بھی تیز بارش کا امکان ہے، 20دسمبر (رات)سے 21سمبر کے دوران مری اور گلیات میں تیز بارش اور پہاڑوں پر برفباری ہو سکتی ہے۔رپورٹ کے مطابق 20اور 21دسمبر کو سرگودھا، خوشاب فیصل آباد حافظ آباد، گوجرانوالہ سیالکوٹ، لاہور، میں مطلع ابر آلود رہنے کے ساتھ بوندا باندی کی توقع ہے۔محکمہ موسمیات کے مطابق پہاڑی علاقوں میں لینڈ سلائیڈنگ، سڑکوں کے بند ہونے اور پھسلن کا اندیشہ ہے، ایسی صورتحال میں شہریوں کو محتاط رہنے کی ہدایت کی گئی ہے۔