اسلا م آباد(نیوز ڈ یسک ) وفاقی دارالحکومت اسلام آباد سمیت ملک کے زیادہ تر علاقوں میں آج بھی سرد اور خشک موسم برقرار رہنے کی پیشگوئی کی گئی ہے۔محکمۂ موسمیات کا کہنا ہے کہ بالائی پہاڑی خطوں میں شدید سردی کی لہر جاری رہے گی، جب کہ پنجاب، خیبر پختونخوا اور بالائی سندھ کے میدانی علاقوں میں سموگ اور دھند چھانے کا امکان ہے۔محکمہ نے مزید بتایا کہ اسلام آباد، مری، گلیات، پنجاب، خیبر پختونخوا، سندھ اور بلوچستان کے متعدد علاقوں میں موسم معمول سے زیادہ سرد رہے گا۔
اسی طرح گلگت بلتستان اور آزاد کشمیر میں بھی ٹھنڈ کا زور برقرار رہے گا۔ادھر لاہور، سیالکوٹ، نارووال، شیخوپورہ، گوجرانوالہ، گجرات، جہلم، ساہیوال، ملتان، خانیوال، بہاولپور، رحیم یار خان، سکھر، روہڑی، گھوٹکی، لاڑکانہ، موہنجو دڑو، پشاور، صوابی، مردان، چارسدہ، نوشہرہ اور ڈیرہ اسماعیل خان میں بھی گھنی دھند پڑنے کی توقع ہے۔
