اسلام آباد – اسلام آباد ہائی کورٹ کے جج جسٹس راجہ انعام امین منہاس دورانِ سماعت اچانک طبیعت خراب ہونے کے باعث ہسپتال منتقل کر دیے گئے۔عدالتی ذرائع کے مطابق، جسٹس راجہ انعام امین منہاس اور جسٹس ارباب محمد طاہر پر مشتمل ڈویژن بنچ کی سماعت جاری تھی کہ اچانک جسٹس انعام بے ہوش ہو کر کرسی پر گر پڑے۔
واقعے کی اطلاع ملتے ہی چیف جسٹس سرفراز ڈوگر اور اسلام آباد ہائی کورٹ کے دیگر ججز فوری طور پر کلثوم انٹرنیشنل ہسپتال پہنچ گئے۔ہسپتال کے ذرائع نے بتایا کہ ڈاکٹرز کی فوری طبی امداد کے بعد جسٹس راجہ انعام امین منہاس ہوش میں آ گئے ہیں اور ان کی طبی حالت بہتر ہے۔ابتدائی اطلاعات کے مطابق، دورانِ سماعت اچانک طبیعت ناساز ہونے کے سبب سماعت روک دی گئی اور جسٹس منہاس کو فوری طور پر ہسپتال منتقل کیا گیا، جہاں ان کا طبی معائنہ جاری ہے۔
