فیصل آباد کے علاقے ملک پور میں کیمیکل فیکٹری میں شدید دھماکے کے نتیجے میں ہلاکتوں کی تعداد 15 تک پہنچ گئی ہے، جبکہ 7 افراد زخمی ہیں جنہیں فوری طبی امداد فراہم کی جا رہی ہے۔

کمشنر فیصل آباد، راجا جہانگیر انور، کے مطابق ابتدائی تحقیقات سے معلوم ہوا ہے کہ دھماکا گیس پائپ لائن پھٹنے کی وجہ سے ہوا۔ زیادہ جانی نقصان فیکٹری سے جڑے رہائشی مکانات میں ہوا، کیونکہ ملک پور میں چار فیکٹریاں ایک ساتھ منسلک ہو کر کام کر رہی تھیں۔

دھماکے کی شدت اتنی زیادہ تھی کہ فیکٹری کی عمارت مکمل طور پر زمین بوس ہو گئی اور ملحقہ گھروں کی چھتیں بھی گر گئیں۔ ریسکیو حکام جائے وقوعہ پر موجود ہیں اور ملبے تلے دبے افراد کو نکالنے کے لیے کام کر رہے ہیں۔

وزیراعلیٰ پنجاب خود ریسکیو آپریشن کی نگرانی کر رہی ہیں، جبکہ کمشنر نے واقعے کی تحقیقات کے لیے پانچ رکنی کمیٹی قائم کرنے کا اعلان کیا ہے۔

یہ حادثہ ملک پور کی صنعتی حدود میں شدید ترین قرار دیا جا رہا ہے اور ریسکیو ٹیمیں اب بھی ملبے میں ممکنہ افراد کو تلاش کر رہی ہیں۔