راولپنڈی (20 نومبر 2025ء) شدید دھند اور حدِ نگاہ صفر ہونے کے باعث موٹروے ایم-ون کو پشاور ٹول پلازہ سے چھچھ انٹرچینج تک دونوں جانب سے مکمل طور پر بند کر دیا گیا۔ ترجمان موٹروے پولیس کے مطابق یہ فیصلہ مسافروں کی جان و مال کے تحفظ اور کسی بڑے حادثے سے بچاؤ کے لیے کیا گیا ہے۔

ترجمان نے بتایا کہ گزشتہ چند گھنٹوں میں دھند کی شدت میں غیر معمولی اضافہ ہوا ہے جس کے باعث ڈرائیونگ نہایت خطرناک ہو چکی ہے۔

موٹروے پولیس نے شہریوں کو ہدایت کی ہے کہ دھند کے موسم میں غیر ضروری سفر سے گریز کریں، گاڑی میں فوگ لائٹس استعمال کریں، اگلی گاڑی سے معمول سے زیادہ فاصلہ رکھیں اور تیز رفتاری سے مکمل پرہیز کریں۔

مزید کہا گیا ہے کہ سفر کا ارادہ کرنے والے افراد ہیلپ لائن 130 پر رابطہ کرکے موٹروے کی تازہ ترین صورتحال معلوم کریں، جبکہ مسافر معلومات کے لیے موٹروے پولیس کے آفیشل فیس بک، ٹوئٹر اور دیگر سوشل میڈیا پلیٹ فارمز سے بھی رہنمائی حاصل کرسکتے ہیں۔