اسلام آباد (نیوز ڈیسک)مسلم لیگ (ن) کے سینئر رہنما اور سابق وزیراعظم نواز شریف کے قریبی ساتھی سینیٹر عرفان صدیقی انتقال کر گئے۔نجی ٹی وی اے آر وائی نیوز کے مطابق عرفان صدیقی گزشتہ دو ہفتوں سے اسلام آباد کے ایک نجی اسپتال میں زیر علاج تھے۔ پیر کے روز ان کے وینٹی لیٹر پر منتقل ہونے کی خبریں گردش میں آئیں، تاہم اہلِ خانہ نے ان خبروں کی تردید کی تھی۔ رات گئے یہ افسوسناک اطلاع موصول ہوئی کہ وہ خالقِ حقیقی سے جا ملے۔عرفان صدیقی کو نواز شریف کے نہایت قریبی اور بااعتماد رفقا میں شمار کیا جاتا تھا۔

ان کی مسلم لیگ (ن) کے ساتھ وابستگی 1997 میں اس وقت شروع ہوئی جب وہ اُس وقت کے صدر محمد رفیق تارڑ کے تقریر نویس کے طور پر کام کر رہے تھے۔سیاست میں آنے سے قبل عرفان صدیقی ایک معروف کالم نگار اور معلم رہے۔ وہ سر سید کالج میں بطور لیکچرار خدمات انجام دیتے رہے اور مختلف اخبارات میں لکھنے کے ذریعے اپنی علمی اور فکری پہچان بنائی۔بعد ازاں وہ نواز شریف کے تقریر نویس کے طور پر بھی ذمہ داریاں نبھاتے رہے۔ مسلم لیگ (ن) نے انہیں سینیٹ کا ٹکٹ دیا، جہاں وہ پارٹی کی نمائندگی کرتے ہوئے قائدِ ایوان کے عہدے پر بھی فائز رہے۔ان کے انتقال پر سیاسی و صحافتی حلقوں میں گہرے دکھ اور افسوس کا اظہار کیا جا رہا ہے۔