اسلام آباد (نیوز ڈ یسک) محکمہ موسمیات نے پیش گوئی کی ہے کہ آئندہ چند روز کے دوران پنجاب کے بیشتر اضلاع میں بارش کا امکان ہے۔ترجمان پی ڈی ایم اے پنجاب کے مطابق 4 اور 5 نومبر کو صوبے کے مختلف علاقوں میں ہلکی بارشیں متوقع ہیں، جن کے نتیجے میں درجہ حرارت میں نمایاں کمی دیکھی جائے گی۔رپورٹ کے مطابق لاہور، راولپنڈی، مری، گلیات، اٹک، تلہ گنگ، جہلم، سرگودھا، خوشاب، گجرانوالہ، سیالکوٹ اور نارووال میں بارش ہونے کی توقع ہے، جبکہ مری اور گلیات سمیت بالائی پہاڑی علاقوں میں برف باری بھی ممکن ہے۔

پی ڈی ایم اے نے بتایا کہ بارشوں سے اسموگ میں کمی کی امید ہے، شہری احتیاط برتیں، ماسک کا استعمال کریں اور غیر ضروری طور پر گھر سے باہر نہ نکلیں۔ محکمے کا کنٹرول روم 24 گھنٹے صورتحال کی نگرانی کر رہا ہے۔ڈی جی پی ڈی ایم اے عرفان علی کاٹھیا نے شہریوں کو ہدایت کی ہے کہ خراب موسم میں غیر ضروری سفر سے اجتناب کریں اور اگر سفر ضروری ہو تو فوگ لائٹس کا استعمال ضرور کریں۔انہوں نے مزید کہا کہ کسی بھی ہنگامی صورتحال میں شہری پی ڈی ایم اے ہیلپ لائن 1129 پر فوری رابطہ کریں، جبکہ کسان حضرات کو مشورہ دیا گیا ہے کہ وہ اپنی زرعی سرگرمیاں موسم کی پیش گوئی کو مدنظر رکھتے ہوئے ترتیب دیں۔