اسلام آباد (نیوز ڈیسک) پاکستان تحریک انصاف (پی ٹی آئی) کے بانی عمران خان نے اطلاعات کے مطابق اپنی بہن علیمہ خان کو پارٹی معاملات میں اثرانداز ہونے سے روک دیا ہے۔ذرائع کا کہنا ہے کہ خیبرپختونخوا سے تعلق رکھنے والے پی ٹی آئی کے دو اہم رہنماؤں نے چند روز قبل عمران خان سے ملاقات کے دوران علیمہ خان کے کردار پر شکایت کی تھی۔ دونوں رہنماؤں نے مؤقف اختیار کیا کہ انہیں اصل حقائق کے بجائے مختلف انداز میں بات پہنچائی جاتی ہے۔
اطلاعات کے مطابق رہنماؤں نے عمران خان کو بتایا کہ چونکہ آپ کی ہم سے ملاقاتیں نہیں ہو رہیں، اسی باعث غلط فہمیاں پیدا ہو رہی ہیں۔ ان کا مزید کہنا تھا کہ علیمہ خان نے خیبرپختونخوا حکومت کے حوالے سے آپ کو درست معلومات فراہم نہیں کیں۔ اسی پس منظر میں وزیراعلیٰ علی امین گنڈاپور کی عمران خان سے ملاقات کا مقصد بھی یہ غلط فہمیاں دور کرنا تھا۔یاد رہے کہ چند ماہ قبل علیمہ خان نے میڈیا سے گفتگو کرتے ہوئے سلمان اکرم راجہ سے اختلافات کی خبروں کی تردید کی تھی۔ ان کا کہنا تھا کہ سلمان اکرم راجہ نہ صرف ان کے وکیل ہیں بلکہ خاندان کے فرد کی طرح سمجھے جاتے ہیں۔ انہوں نے وضاحت کی تھی کہ ان کے اور راجہ صاحب کے درمیان کسی قسم کی تلخی یا سخت جملوں کا تبادلہ نہیں ہوا اور یہ محض افواہیں ہیں۔
