اسلام آباد(این این آئی)محکمہ موسمیات نے ملک کے مختلف علاقوں تیز ہواں اور گرج چمک کے ساتھ بارش اور ژالہ باری کی پیشگوئی کردی ہے۔محکمہ موسمیات کے مطابق ملک کے بیشتر علاقوں میں (آج)جمعے کو موسم گرم اور خشک رہے گا تاہم بعض بالائی علاقوں میں بارش اور ژالہ باری کی پیشگوئی کی گئی ہے، سیلاب متاثرہ سندھ اور پنجاب میں رواں ہفتے موسم گرم رہنے کا امکان ہے۔

محکمہ موسمیات کے مطابق خیبرپختونخوا، گلگت بلتستان اور کشمیر میں چند مقامات پر بارش متوقع ہے جب کہ اسلام آباد اور گردونواح میں بارش کا 40فیصد امکان ہے۔(آج)جمعہ کواسلام آباد میں موسم گرم اور خشک رہے گا، خیبر پختونخوا میں تیزہواں اور گرج چمک کیساتھ بارش کا امکان ہے جب کہ بعض مقامات پر ژالہ باری کا بھی خدشہ ہے۔محکمہ موسمیات کے مطابق بالائی خیبرپختونخوا میں چند مقامات پر بارش کا امکان ہے، (آج) جمعہ کوپنجاب بھر میں موسم گرم اور خشک رہے گا۔موسم کا احوال بتانے والوں نے کہا کہ بلوچستان کے بیشتر علاقوں میں موسم خشک رہے گا جب کہ گلگت بلتستان میں بارش جب کہ کشمیر میں خشک موسم متوقع ہے۔

دوسری جانب سوات کی حسین وادی کالام کے پہاڑوں پر موسم سرما کی پہلی برفباری ہوئی، جس کے بعد بالائی سیاحتی مقامات مالم جبہ، مدین، ماندم اور بحرین میں سردی کی شدت بڑھ گئی ہے۔ادھر مرکزی شہر مینگورہ اور گردونواح میں تیز بارش کے بعد موسم خوشگوار ہوگیا ہے، کچھ مقامات پر بارش کا پانی سڑکوں پر جمع ہوگیا اور سڑکیں تالاب کا منظر پیش کرنے لگیں، جس سے شہریوں کو مشکلات کا سامنا کرنا پڑا۔تاہم دلفریب موسم سے لطف اندوز ہونے کے لیے سیاحوں کی آمد کا سلسلہ بھی شروع ہوگیا ہے۔ تمام سڑکیں آمدورفت کے لیے کھلی ہیں اور سیاح بآسانی ان علاقوں کا رخ کرسکتے ہیں۔