اسلام آباد (نیوز ڈیسک) لاہور کے علاقے رائیونڈ میں 30 روپے کے معمولی جھگڑے پر دو سگے بھائیوں کے قتل میں ملوث دو اہم ملزمان انجام کو پہنچ گئے۔پولیس کے مطابق دونوں ملزمان کو نشاندہی کے لیے رائیونڈ لے جایا جا رہا تھا کہ اچانک ان کے ساتھیوں نے پولیس ٹیم پر حملہ کر دیا اور انہیں چھڑانے کی کوشش کی۔

ترجمان لاہور پولیس کا کہنا ہے کہ حملے کے دوران ہونے والی فائرنگ میں زیر حراست مرکزی ملزمان اویس اور شہزاد موقع پر ہلاک ہو گئے۔پولیس کے مطابق فائرنگ ملزم توقیر اور اس کے ساتھیوں کی طرف سے کی گئی، جو واقعے کے بعد فرار ہونے میں کامیاب ہو گئے۔سی سی ڈی چوہنگ پولیس نے فوری ردعمل دیتے ہوئے علاقے میں سرچ آپریشن شروع کر دیا ہے اور مفرور ملزمان کی گرفتاری کے لیے کوششیں جاری ہیں۔یاد رہے کہ ہلاک ہونے والے دونوں ملزمان نے چند روز قبل محض 30 روپے کے تنازع پر دو سگے بھائیوں کو بدترین تشدد کے بعد قتل کر دیا تھا۔